يعنى ايه

يعنى ايه
يعنى ايه شاب تقوله بتحب بلدك يقولك لاء
  تقوله ايه اخبارك يقولك ماشيه بالزق
 تقوله ايه احلامك يقولك مفيش
تقوله بيتك عربيتك يقولك معنديش
بقى هيا دى بلد؟؟؟
تسرقو الوليد قبل ما يتولد؟؟
يا عم ياللى ماسك حس على دمك
ما هو الشاب ده لو يهمك
كنت نيمته على ريش نعام
تقوله بتحب بلدك يقولك بلدى  يا سلااااااااااام
تقوله ايه الاخبار يقولك تماااااام
تقوله بيتك عربيتك
يقوللك فيلا وعربيه بشوفير
تقوله احلامك
يقولك مشير
هقولك تالى
ياعم ياللى ماسك
مطلبى مطلب مشروع
انا لا قلت فيلا ولا عربيه
ولا مليون اعمل مشروع
كل اللى طالبه اعيش انسان
ليه كرامه يحترم ولا يتهان
انا عارفك زعلت  ودمك اتعكر
طب
يسقط يسقط حكم العسكر
يسقط يسقط حكم العسكر

لسه كلب

لسه كلب
ايوه يا بيه متستغربش لسه كلب
اصل انت عمرك ما هتحس بيا
اصل انت معاك كارنيه بيمشى كل حاجه
اصل سيادتك مسئول كبير
وانا لسه كلب
كلب فى طابور عيش اقف ساعتين ويقولى مفيش
كلب فى طابور انابيب اقف 6 ساعات ويقولى بكره هنجيب
كلب لما اركب البوكس
كلب لما ادخل قسم شرطه
كلب بيمون عربيه ويوسع لجنابك لما توصل
انا عارفك مستغرب لكلامى ومش مصدق حاجه
هى سهله وبيسيطه ومش محتاجه
انزل فى يوم من غير  بدله ولا كارنيه
وهتعرف ساعتها انا بحكى فى ايه
وساعتها هتبقى كلب
بس كلب ابن عز اتربى على الهنا
مش كلب بلدى زيى انا
معلش يا بيه عكرت دمك
اصل الموضوع كله ولا يهمك
انت راجل واكل شارب نايم
مش حاسس بالكلاب ولا بالبهايم
يا بيه امتى نبقى واحد
ونقف انا وانت فى طابور واااااحد
ونعيش اللى باقى من عمرنا بنى آدمين
الظاهر لو سكتنا هنفضل ع الحال ده سنين
علشان كدا احنا لسه فى الميادين

المصريين بين الطيار والديلفرى

الشعب المصرى من وجهه نظرى المتواضعه جدا جدا جدا
مقسومين نصين نص طيار بيجرى فى الشوارع والميادين  ليل نهار بيطالب بحق الشعب فى الحريه والكرامه والتقدم
ونص تانى مستنى الديلفرى يوصل و قاعد فى البيت بيتفرج على روتانا سينما ومدفى تحت البطانيه. طيب يا عم الحج انت قاعد فى الدفى استحاله تتساوى انت والطيار ابدا
الطيار ثائر بينزل الشارع يطالب بحقه وبيضرب ويتهان ويموت علشان يجيب حقه ده وحقك كمان
يبقى متجيش تلومه لما ينزل الشارع ومتسألوش هو نزل ليه
 لان دى شغلته وانت عمرك ما فكرت تنزل الشارع اصلا
شغلته كلها تطوع  مش بياخد عيها قرش وانت اكيد مستغرب ده وبتساله كتير
(انتو مين بيدعمكم)
(بتصرفو منين)
 انت يا عم الحج ياللى مستنى الديلفرى يوصل
متوقفش عمل الطيار
وتقول عليه خرب البلد  ولازم يهدو شويه
الطيار لو وقف وبطل ينزل الشارع
الديلفرى بتاعك مش هيوصلك
لازم وضرورى جدا ناس فى الميادين تهتف وتطالب علشان الديلفرى بتاعك يوصلك البيت
وللاسف الناس دول  بتموت فى السكه
وبتتصاب
وبتتبهدل
وبيضيع بصرها
يعنى للأسف فى طيارين كتير مش هيقرو الموضوع ده
شغلانه صعبه مش زى ما فى خيالك
ولو مش مصدق انزل الشارع
شاركهم
حسهم
لان النهارده الطيارين بيجيبولك حقك
 لكن هييجى اليوم هيبقى الاوردر
اكبر من الطيارين كلهم
الاوردر عاوز كل الطيارين وكل اللى تحت البطانيه
الاوردر كرامه وطن
وساعتها لازم تنزل الشارع
لان حقك مش هيوصلك ديلفرى
وهييجى اليوم اللى تندم فيه انك مكنتش طيار
----------------------------
دعوه  لوظيفه طيار  فى مطعم اسمه مصر
محتاجين ناس كتير
مجتاجين 90 مليون طيار
الانترفيو يوم 25 يناير القادم
متضيعش الفرصه

رساله لكل متحيز

(الشباب لازم يهدو شويه على الحكومه دول خربو البلد حرام عليهم)
(الشباب الثوار دول رجاله هما اللى هيجبولنا هقنا)
اى عباره من الاتنين انا بجد مش عارف انهو واحده هتعجبك وانهو واحده تعصبك
بس ايا كان احنا الاتنين عاوزين استقرار وعاوزين مصلحه البلد تبقى احسن
وبم ان حريه الراى مكفوله
(مثلا)
فمن حق كل واحد يقول اللى هو عاوزه
وانت من حقك تقبله او ترفضه
فتعالو نفكر بس بمنطقيه
ايه اللى عملوه الولاد دول
(شباب التحرير فى كل ميادين مصر)
ونشوف ايه المكاسب السياسيه
وايه الخساير اللى عادت على البلد منهم
ونشوف
لو المكاسب اكبر من الخساير نبقى نشجعهم ونساندهم
ولو الخساير اكبر من المكاسب
يبقى بعتنالهم رساله يعرفو فيها ان الغالبيه مش متقبله اللى هما بيعملوه
ومن وجهه نظرى المتواضعه
ان قمه الرجوله انك تعيد ترتيب افكارك
لو اقتنعت بوجهه نظر اخرى شايف انها تخدم دينك وبلدك
اول حاجه نبدا بالخساير اللى جابوهالنا بتوع التحرير
عدم استقرار
انفلات امنى
ضربو السياحه
دمرو اقتصاد البلد
شتتو فكر الراى العام
افسدو الحياه السياسيه
اسمحولى اعقب على الكلام ده وبعدين ندخل فى المكاسب
عدم استقرار مشكله شرطه والشرطه اهى شغاله زى الفل وبيد من حديد على شباب التحرير
ضربو السياحه انا معاكم السياحه اتاثرت وفى بيوت كتير اتقفلت
بس بالنسبه لربح البلد من السياحه احنا مشفناش حاجه منو خالص
بالنسبه للبيوت اللى اتقفلت
دى فتره انتقاليه وفيها ضحايا
ولكن المفروض القائمين على البلد يشوفو ايه اللى ادى اللى ضرب السياحه
ويعالجو الموضوع ده
وعلى فكره مصر شغاله وزى الفل بعيد عن ميدان التحرير
بالنسبه لدمرو اقتصاد البلد
انت عارف مصر بيدخلها كام فلوس فى الشهر؟
عارف اد ايه بنكسب من قناه السويس؟
عارف اد ايه بنكسب من النايل سات؟
عارف اد ايه بنكسب من شركات المحمول؟
اكيد لا لانه غير معلن
يبقى منحكيش فى اقتصاد البلد خالص
لان جايز يكون فى حراميه وهما اللى خربو اقتصاد البلد
بالنسبه لتشتيت فكره الراى العام
والله احنا عندنا وزاره اعلام للأسف مش بتعرض الحقايق وكل هدفها تلميع الحاكم و وتشويه الثوار
وده اللى بيخلينى اتفرج على القنوات خاصه والقنوات الخاصه كل هدفها الفلوس
فدى مشكله اعلام مش مشكله شباب التحرير
بالنسبه لافساد الحياه السياسيه
احنا محدش فينا فاهم سياسه
وكلمات كتير دخلت علينا مكناش نعرفها
وبقينا نتكلم فيها من بعد الثوره
تكنوقراط فلول دوله مدنيه حكم عسكر انتخابات قوائم وفردى
حجات كتير مكناش نعرفها
وبقينا نتكلم فيها
وانا شايف ان الناس اتثقفت وعرفت حجات كتير
خلصنا الخساير وندخل على المكاسب
اسقاط نظام مبارك
محاكمه مبارك
حل مجلسى الشعب والشورى المعينين بالتزوير
عرفنا يعنى ايه كلمه لا
حكومه من التحرير تعبر عن الشرعيه
حكومه الجنزورى
ولسه مكملين كل يوم مكاسب طول ما هما قاعدين
نيجى نتكلم الشباب بتتظاهر ليه؟
لان المكاسب بتاعتهم عكرها فساد نظام قديم
وهما غلطو لما شالو راس نظام
انهم مشالوش النظام بالكامل
يبقى يمشو؟
ونبقى خسرنا بس دم الشباب
ونرجع بقى لايام زمان
مش هو لو مفيش شباب تحرير
كان زمان حكومه شرف موجوده 

ومكنش هيبقى فيه الجنزورى اللى عاجبكم؟
ومكنش فى محاكمه لمبارك؟
وومكنش فى ثوره اصلا؟
يا جماعه والله احنا كل يوم بنكسب
والله كل يوم
احنا مكناش نعرف نقول لا فى وش امين شرطه
دلوقت بنتحكم فى مستقبل دوله
يبقى نساند الشباب دول
ومينفعش نقول نصبر للمجلس
نصبر ايه
غاز لاسرائيل
مصرى بيتقتل على الحدود
كرامه متهانه
رشوه فى كل المصالح الحكوميه
اعلام فاشل
اقتصاد دوله بيتسرق
ناس بتموت من الجوع
نصبر على ايه؟؟؟

احترام الوقت اساس التقدم

فى ناس كتير جدا بتستهتر بالوقت
وانها مفرقتش ساعه من ربع
وايه يعنى الاتوبيس يتاخر مادام كدا كدا هيوصل
الكلام ده يا جماعه هبل
احترامك للوقت اول حاجه معناه انك انسان مهم مهما كانت درجه وظيفتك
ازاى
يعنى لما ظابط الشرطه يحترم معاده لما يروح يقابل مواطن عادى زى ما يقابل وزير هو كدا حقق المساواه
فى احترامه للوقت
لما اليابان تحدد لنفسها خطه محدده بالوقت تمشى عليها
يبقى انا مربوط بوقت لازم انجز فيه
فالعمل يتحقق واوصل لاهدافى
احنا هنا فى مصر بنمشى بالساعه
فى اليابان بالثانيه
بجد والله تقدم ما بعده تقدم احترامك للوقت
لدرجه ان الشعب اليابانى اصبح لا يستوعب فكره ان قطار يتأخر او اتوبيس او كدا
ويعتربر تأخر القطار او الاتوبيس كارثه
وتسيب
فياريت نحس ان احنا ضيعنا كتير ولازم نعمل حاجه ونحددها بالوقت علشان الحكايه متسبش مننا
وده اللى خلانى ارفض المجلس العسكرى اللى بيماطل من حين للتانى فى تسليم السلطه
الواقت بيضيع والثوانى بتفرق فى حياه الشعوب واحنا مره سنه ومره ست شهور ومين عارف
لازم خطه موضوعه للأنتهاء من الفتره الانتقاليه بكل سلام
ولا ايييييييييييه؟

رساله من شاب الى ابيه

ابى
يكاد ينفطر قلبى وانا اكتب اليك هذه الرساله
وتنهمر دموعى  وتهتز  يدى ويتوقف قلمى عن الكتابه
ثم استعيد انفاسى لاكتب
فتنازعنى نفسى وتدافع عنك
فأصر على الكتابه
ثم اعود لاراجع ما كتبت
فلا اجد الا كلمات مدح وهجاء
مدح وهجاء لشخص واحد؟
ما هذا الا هراء
فأقطع الصفحه  تلو الصفحه
وانظر الى الورقات المبلله بالدموع
وهى تأمرنى بالرجوع
ولكن رسالتى؟
كيف لى ان لا اقول رسالتى؟
فقررت ان اكتبها
ولا ارسلها
وسيأتى عليك الوقت كى تقرأها
ابى
اقولها الان ولا اخجل
انت من ضيع حقوقى
انت من اهدر كرامتى
انت من قيد حريتى بدافع الخوف
اخبرنى الان مما كنت تخاف؟
اتخاف على طفل ذاق العذاب اطنان؟
ام تخاف على رزق  فى يد الرحمن؟
رأيت وطنى يباع واسالك تقول وطننا فى امان
رايت كرامتنا تهان واسالك تقول
ارحمونى انا انسااااااااااااااااان
علمتنى كيف الصلاه
و لم تأخذنى معك لمسجد قط
علمتنى حب البلد
وحين اعترضت قلت جن الولد
اخبرنى الان اين حقى  كى اعيش
ضاع حقى
وحين ذهبت  لابحث عن حقى وحقك
ذهبت وحيدا بدونك
وكم كان يحز فى نفسى ان خرج بدونك
وحين خطوت الخطوه الاولى فى طريقى
تامرنى بأن اتوقف
اتوقف لكى يضيع مجددا؟
اتوقف  يا ابى  وانت فى سن الستين
اتوقف يا ابى وانت سندى
وانا مازلت ابن عشرين
اتفهم ما اقول؟؟؟
سأطيعك ولكن اعطنى ضمانا واحدا كى اعيش
اتضمن لى ان اعيش؟
ام انها انفاس فى يد الخالق؟
اذن اتركنى اموت
لتعيش انت ويحاسب كل سارق
لتعيش انت ويحاسب كل سارق
امضاء ابنك الذلول

قررت ان اكتب المعدول بالمقلوب

قررت ان اكتب المعدول بالمقلوب
حتى يراه كل غافل ودئووب
سأروى لك الفساد وانه حضاره شعوب
سأروى لك القيم وانها خراب امم
سأروى لك السلام وانه فكر لئام
... سأروى لك الحقوق وانها واجب محقوق
سأروى لك العداله وانها خسه ونداله
سأروى لك الحريه وانها ذل البشريه
سأحدثك عن الثوار وانهم علينا عار
هكذا حكامنا علمونا
غيرو فكرنا واهانونا
فأنسلخت انا ورفاقى خلسه
فاتهمونا بأننا قله مندسه
صنعنا المجد بأيدينا
فقالو نخرب بيوت اهالينا
فها نحن مستمرين فى الفساد مكملين
نحرق الشوارع والميادين
هكذا رأيتمونا
لانهم قلبوك وبجهلهم عدلونا
لانهم قلبوك وبجهلمهم عدلونا