امتهان كبير جدا لحقوق المواطن انه يقضى نص عمره بيدور على ابسط حقوق المواطنه
اللى هى رعايه صحيه سكن كريم وظيفه محترمه
والامتهان الاكبر انه لما يشتكى محدش يسمعه
والامتهان الاكبر والاكبر انه معاق يعنى المفروض ياخد رعايه اكبر واهتمام اكبر
لكن فى مصر الانفرادات مازالت مستمره
لما بيخطر فى بالى معامله المعاقين فى اليابان وفى فرنسا
لما معاقين حركيا وزهنيا بيشاركو بفاعليه رهيبه فى المجتمع
وكيف ان الدوله بتوفر لهم جميع المقومات علشان يعيشو حياه متساويه
وافتكر منظر المكفوفين فى اليابان والصين وهما فى مارسون جرى وهما بيلعبو كوره
وبفتكر مواطنين معاقين فى مصر كل حلمهم وظيفه توفر لهم حياه اقل من الكريمه
ولما ياخدو وعود ملهاش آخر ولما عمرهم يروح هدر فى وعود
ولما اشتكو محدش عبرهم ولما اعتصمو قدام مبنى محافظه اسيوط
من 9 صباحا الى 3 عصرا ولم يجدو الا نظرات وضحكات سخريه من موظفى ديوان عام المحافظه قررو قطع خط السكه الحديد
واذ بالصدمه الكبرى بدلا من ان تستجيب المحافظه لطلبات تعيينهم
الا انهم فضو اعتصامهم بالقوه
فقرر هولاء الابطال عمل اعتصام مفتوح لحين تحقيق مطالبهم
وحين جلست مع احدهم اخبرنى بانه لو انسان عادى لاستطاع ان يعمل عامل مبانى يحمل طوب ورمل ووصل الامتهان والذل بان احدهم طلب من المحافظ ان يخرج لهم كارنيهات تسمح لهم بالتسول
والى الان لم تستجاب مطالبهم
وهم مازالو مصرين على موقفهم فى توفير فرص عمل لهم
وكانت المفاجاه الكبرى بان وعدهم المحافظ بفرصه عمل فى اوائل شهر يوليو
بعد تولى رئيس جديد وتشكيل حكومه جديده
حياه ابوك انت راجل سكره وملعون ابو اللى يزعلك يا شيخ
المعاقين عاملين اعتصام جنب محطه القطر وجنبهم مقلب زباله ريحته تقرف
ولا حد مهتم بمقلب الزباله ولا حد مهتم بيهم وكانهم الاتنين واحد
المشكله الكبرى انى لما سمعت انهم وقفو خط السكه الحديد وقلت ربنا يوفقهم ومطالبهم تتحقق واحد قالى حرام عليهم وان المفروض يتسجنو ويتجازو
مش فاهم ازاى يتجاوز وهما اصلا عاملين المولد ده علشان يشتغلو
فعلا النهارده عجزت عن تحديد معنى لكلمة معاق
لما ناس عندها اراده حديديه وبتعتصم وتقطع طريق والشرطه تضربهم ويرجعو تانى ويصرو على اعتصامهم وفى ناس يقال عنهم انكم كاملين
رافضين الاستجابه ليهم
يبقى كلمه معاق دى اما معناها اصرار وتحدى
ام انها كلمه لا تمت بصله الى من فقد احدى اطرافه
السلام عليكم
ازيكم يا جماعه
انا عارف ان اسم الموضوع يخض وصعب شويه
لكن الموضوع نفسه اسهل منه مفيش
وعلشان نهدى اعصابكم
واللى فشته عايمه يشاركنا الحوار
بينا هيلاهوب نضرب ضحكه وبعدها نبدا
ههههههههههههههههههههههههههه
اشطه ؟؟
حتى لو مش اشطه انا هتكلم
بعد ما الناس كلها حكت ورغت عن المعونه الامريكيه
ويا عينى قلب امه الجنزورى قاعد عمال يشحت من كل الدول علشان اقتصاد مصر
وكان بيبكى فى التلفزيون زعلان على مصر
وان الفتره دى فتره انتقاليه ومش عارف ايه
وان اقتصاد مصر بينهار
وانقذوو مصر
وفى ظل هذه الاجواء ظهر اقتراح رفض المعونه الامريكيه وده كان اقتراح من الشيخ محمد حسان
وظهر ناس كتير بتأيد الفكره
قبل ما اعقب على الكلام ده
احب اهنىء المجلس العسكرى على نجاحه فى افشال ثوره الشباب
الا اذا قامت للشعب ده قومه والله المستعان
بالنسبه للمعونه الامريكيه هى عباره مساعدات بتقدمها امريكه لاغلب دول العالم
رغم ان امريكا فى احتياج كبير لرؤوس الاموال وان عليها دوين متلتله
طب بتدفعها ليه؟؟
بتدفع المعونه دى علشان تكسر عين البلد التى تقبل المعونه
والمعونه بتكون اما اموال واضحه وصريحه اما مساعدات فى تسليح او ما شابه
المهم امريكا مش عاشقه جمال مصر
وامريكا كانت بتدفع المعونه دى لمصر بالتحديد علشان تكسب حليف قوى فى الشرق الاوسط يساند اسرائيل الطفل المدلل لاميركا
ومبارك الله يحرقه مطرح ما كان
كان بياخدها ويضربها فى جيبه
واحنا مشفناش منها حاجه
والمعونه فى شكلها الظاهر مساعدات من امريكا للدول الفقيره لمساعداتها فى التنميه
وهى فى الحقيقه فى باطنها استعمار امريكى وده بيبقى واضح اوى لحكام البلاد اللى بتقبل المعونه وانا بوضح دى علشان لما اقول ان مبارك واصحابه والشله كلها كانو عملاء محدش يزعل المهم نيجى بقى نحكى فى الجزء التانى من الموضوع وهو اقتصاد مصر
اول حاجه لازم كلنا نبقى عارفين ان مفيش مننا على اطلاع واضح عن اقتصاد مصر الا الناس التى تملك ميزانيه الدوله
وان البلد لو بتخسر بجد يبقى دى اداره فاشله
ولو ان اللى ماسك الدوله راجل تمام يظهر الميزانيه لعوام الناس
حتى يتشاورو فى امر البلد ونشوف راى العقلاء والاقتصاديين فى تعديل مسار الميزانيه والنهوض بالاقتصاد
لكن اللى حاصل فى الفتره دى ان محدش مطلع على الاقتصاد
والاعلام طالع بيظهر ان البلد بتنهار وانقذو مصر والكلام القديم ده
طيب يا سيدى ما تيجى نتحاسب؟؟؟؟
قناه السويس جابت كام السنه اللى حكمت فيها مصر؟؟
النايل سات ووزاره الاعلام جابو كام السنه دى؟؟
الضرايب ايه اخبارها؟؟؟
المشاريع الضخمه اللى فى مصر والتى لا تحصى؟
السياحه؟؟؟
العملة الاجنبيه اللى بنجيبها من الناس اللى بتشتغل برا؟؟
لو اطلعنا على الفلوس دى
ممكن نصدق حضرتك ان البلد بتنهار والقصه دى
لكن لو مطلعناش يبقى انت راجل بتكدب علينا
واى منطق يصدق كلامى
لكن مش عارف ليه الناس بتصدق الكدب
وتكدب الصدق
تالت حاجه مصر مش فى احتياج اصلا للمعونه الامريكيه
بدليل اننا كنا بناخدها ويتطبق علينا شروطها من ذل ومهانه
ومكناش بنطول منها قرش وكان مبارك بيوزعها هو واصحابه على نفسهم
فلو رفضناها يبقى احنا رفضنا قيود مرفضناش فلوس
وده يبقى اول مراحل التقدم واننا يكون لنا كرامه وراى وما شابه
طب نجيب فلوسها منيييييييييين؟؟؟
لحد النهارده فى ناس بتاخد ملايين فى الشهر
اللى بياخد مرتب مليون واتنين وتلاته كمان
وملايين الملايين بتتصرف لناس حراميه كبار
الملايين اللى اتصرفت على مبارك فى المركز العالمى الطبى
وهز طوله من المركز الطبى للمحكمه
وحمايه معالى الرئيس والحراميه اصحابه فى المحكمات
ملااااايين الملاييين بتتصرف وبتتنهب كل يوم
والله كل يوم ومش ببالغ
وطالعين يضحكو علينا ويقلولنا معونه امريكيه
وعاشت مصر حره مستقله
للأسف الشباب هرش كل القصه دى
وعارف الكدب ده كلو
فأسمحولنا مش هنشترك مع حضراتكم فى مسرحيات
آخر حاجه ومعلش طولت عليكم
مبادره الشيخ محمد حسان لرفض المعونه وان الناس تشارك وتدفعها
مبادره جميله وسلوك طيب
وربنا يكرمه ويجازيه على نيته
لكن من رايى المتواضع
انه كان الاولى التوجه صراحة للحد الاقصى للأجور وتحريم اموالهم اللى بياخدوها بالباطل
ودعوه للأطلاع على اقتصاد مصر
علشان حتى نحس انن شركاء فى البلد دى
واقل تقدير نحس اننا مسئولين
فيتولد قدامنا شعور بالخوف تجاه البلد دى
لكن تقول ايه
كلو بيخبط فى كلو
ومحدش فاهم حاجه
وفى نهايه اللقاء احب اسمع اغنيه
اخترناه وبايعناه واحنا حمير وماشيين وراه
والسلام عليكم ورحمه الله وبركاته
